Kirayə maşınlar: Niyə "Toyota Prius"a üstünlük verilir?
"Toyota Prius" dünyanın ilk seriyalı istehsal olunan hibrid avtomobili sayılır. İstehsalçı ölkə Yaponiyadır. 2005-ci ildə Avropada ilin avtomobili seçilib. Ölçüsü, təchizatı və qiymətinə müvafiq olaraq orta sinif avtomobil kimi qəbul edilir.
Dünyada hibrid avtomobillərə tələbat kəskin artmaqdadır. Bu tendensiya Azərbaycanda da müşahidə olunur. Yeni nəsil avtomobillər Azərbaycana əsasən ABŞ-dan və ya Gürcüstandan gətirilir. Onların sırasında "Toyota Prius" ilk yerdədir.
"Toyota"nın "Prius" modeli bizim alıcılar tərəfindən dayanıqlığına, ehtiyat hissələrinin əlçatanlığına, ən əsası isə qiymətinin münasib olmasına görə populyar model hesab olunur. Bu maşınlar müəyyən sürətə kimi akkumulyatorla çalışır. Paralel olaraq daxili yanma mühərriki ilə də işləməsi üstünlük sayılır. Avtomobillərin istismar müddəti təxminən 5-10 il aralığında dəyişir. Qiymətinə gəlincə, yerli bazarda "Prius"lar 13-20 min manat civarında alıcılara təklif olunur.
"Toyota Prius" avtomobilini həm ailə sahibləri, həm də taksi sürücüləri almağı üstün tuturlar. Bundan əlavə, kirayə verilən maşınlar sırasında da "Toyota Prius" üstünlük təşkil edir.
"Toyota Prius"lar sürücülər üçün sərfəli hesab olunur. Bu tipli avtomobil idarə edənlər amortizasiya xərclərinin az olması, yanacaq sərfiyatı, ehtiyat hissələri və digər göstəriciləri nəzərə alırlar. Ona görə də, belə avtomobillərin ölkəmizə gətirilməsinə üstünlük verirlər. Bu üstünlüklərini Rent a Car sahibləri də, kirayə maşın götürənlər də nəzərə alırlar. Buna görə də Bakıda kirayə götürülən avtomobillər sırasında "Toyota Prius" ilk pillələrdədir.
