Avtomobili haradan almaq sərfəlidir?
Son illərdə ABŞ-dan maşın gətirtmək dəb halını alıb. Amerikadan avtomobil gətirənlərin sayı ildən-ilə artır. Ancaq bu o deməkdir ki, ABŞ-dan gətirilən avtomobillərdə heç bir problem olmur. Əgər elə olsaydı, onda hər kəs ABŞ-dan özünə maşın gətirdərdi.
Amerikadan gələn maşınların ən böyük problemi onların suya düşmüş olmalarıdır. Sistem vasitəsilə məlumat ala bilərsiniz ki, bu maşınla bağlı hansı sığorta ödənişləri olub və hansı təmirdən keçib. İkinci məlumat mənbəyi yenə də məlumat bazalarıdır.
Məsələn, "BMW" və "Mercedes" kimi brendlərin bütün dünya üzrə paylanmış məlumat bazaları var. Yəni əgər avtomobil buradan alınmayıbsa belə, siz dilerə müraciət edərək, avtomobilin hansı təmirdən keçdiyi haqqında məlumatları əldə edə bilərsiniz. Bu, nəzəri hazırlıq və ya məlumat toplanmasıdır.
Elə hallar ola bilər ki, avtomobil heç bir yerdə qeydiyyatdan keçməyib. Bu zaman ustalara müraciət edib, avtomobilin vəziyyəti haqqında məlumat almaq olar. Yəni ABŞ-dan maşın gətirtməyin özü də risklidir. Doğru seçim etməsəniz, bəxtinizə az yararlı və ya yararsız avtomobil də düşə bilər. Məhz bu kimi məqamları gözə alaraq, bəzi insanlar ABŞ-dan avtomobil gətirtməyə maraq göstərmirlər, seçimlərini yerli bazarlarda edirlər.
MDB və Avropa üçün nəzərdə tutulan avtomobillərin keyfiyyətində kifayət qədər fərq var. Dilerlər Azərbaycana avtomobilləri gətirərkən minimum tələblərin ödənilməsinə çalışırlar. Məsələn, hava yastıqlarının sayında minimuma gedirlər və adətən, ölkəyə gətirilən avtomobillərdə iki hava yastığı ilə kifayətlənirlər. Halbuki Avropada dörd hava yastığı ilə buraxılır. Təbii ki, burada qiymət amili var.
Avtomobil alarkən bir məsələdə də diqqətli olmalısınız. Maşını satan adam çalışır ki, avtomobili öz tanış ustasına aparsın. Bu zaman satıcı ilə ustanın gizli sövdələşməsi də ola bilir. Dilerlərə isə buna icazə verilmir, çünki yalan məlumat verdiyinə görə rəsmi məsuliyyət daşıyırlar. Ona görə də dilerlərdən yalan məlumat almaq ehtimalı azdır. Dilerlərdə olan avadanlıqlar avtomobilin bütün sistemlərini dəqiqliklə yoxlamağa imkan verir. Proqram təminatında olan dəyişikliklər, hətta boya qatının dərinliyini ölçən avadanlıqlar belə olduğundan, avtomobil haqqında daha dəqiq və ətraflı məlumat almaq mümkündür.
