İşlənmiş maşın seçərkən edilməli testlər

İşlənmiş maşın alarkən çalışmaq lazımdır ki, avtomobilin xərci çox olmasın. Seçimimizdə aldanmamaq üçün maşınları bir neçə kriteriyaya görə dəyərləndirməliyik.
Tez-tez bu halın şahidi oluruq ki, avtomobil almaq istəyən şəxs seçim qarşısında qalıb. Təbii ki, hər kəs ucuz qiymətə rahat maşın almaq arzusundadır. Bunu reallaşdırmaq isə qeyri-mümkündür. Avtomobil qiymətlərində onların xüsusiyyətlərinə görə məlum bir hədd var. Bu qiymət ətrafında alıcı onun üçün vacib sayılan özəlliklərə sahib avtomobil seçməlidir.
Maşın alarkən ilk növbədə hansı kriteriyaların sizin üçün önəmli olduğuna dair özünüzə sual verməlisiniz. Yaxşı olar ki, sizin üçün avtomobildə vacib olan 5 özəlliyi bir yerdə qeyd edəsiniz. Sizin bütün tələblərinizə cavab verən, üstəlik ucuz olan avtomobil tapa bilməyəcəksiniz.
Ya da bu haqda bir mütəxəssislə məsləhət etmək olar. Yaddan çıxarmaq lazım deyil ki, ideal avtomobil yoxdur, yalnız alıcının tələblərinə uyğun seçim var.
Azərbaycanda əksər alıcılar avtomobil alan zaman öncə onun xərcləri və ehtiyat hissələrinin qiyməti ilə maraqlanır. Ən düzgün xərc hesablanması hər kilometrə görə xərci hesablamaqdır. Əks halda bu, alıcını çaşdıra bilər. Məsələn, alıcı bir ehtiyat hissəsinin qiymətini soruşub onun 250 manat olduğunu öyrənəndə narahat olur. Halbuki bu maşını almaq istəyən adam bu detalın 100.000 km-dən bir dəyişmə ehtimalı olduğunu bilmir.
İşlənmiş maşın alarkən gövdə (kuzov) zərbəsi testi böyük önəm daşıyır. Bu test avtomobilin ciddi zərbə alıb-almadığını müəyyənləşdirmək üçündür. Yüngül cızıqlardan və dəmirdəki kiçik batıqlardan dolayı bəzi detalların rənglənməsi də normaldır. Hətta tək-tək detallar dəyişdirilə də bilər. İşlənmiş avtomobildə bu hallar normaldır. Əsas məsələ avtomobilin güclü zərbə görüb-görmədiyidir.
Güc aqreqatı testi də olduqca vacibdir. Avtomobilin mühərriki və sürət qutusu böyük önəm kəsb edir. Yaxşı olar ki, almaq istədiyiniz avtomobilin mühərrikini yoxlamağa gedərkən özünüzlə peşəkar usta aparasınız. Əgər elə bir tanışınız yoxdursa, onda özünüz sadəcə mühərrikin səsinə qulaq asın. Mühərrik sakit və sabit işləməlidir.
Elektronika testi üçün isə mütləq diaqnostikadan istifadə olunmalıdır. Bu yoxlamanın çox əhəmiyyətli olduğu üçün etibar etdiyiniz bir ustaya müraciət etməyiniz daha yaxşıdır. Sistemdə ciddi problem varsa, o, gələcəkdə sizi ciddi şəkildə xərcə sala bilər.