Səyahət üçün kirayə avtomobil necə seçilməlidir?
Səyahətdə olduğunuz ölkədə kirayə maşın götürməklə gedəcəyiniz ünvana daha tez çata bilərsiniz. Ancaq bunu etməzdən öncə səfərin məqsədinə qərar verməlisiniz. Məsələn, sizi ancaq Romanın gəzməli-görməli yerləri maraqlandırır? Yoxsa Avropanın bir neçə ölkəsini, bir neçə şəhərini gəzmək haqda düşünürsünüz? Çünki kirayə avtomobil seçərkən bu suallara özünüzdə cavab tapdıqdan sonra seçim etməlisiniz.
Dünya üzrə ən tanınmış rent a car şirkətləri Europcar, Enterprise, AVIS, Hertz-dir. Bundan əlavə, kiçik rent a car şirkətləri də fəaliyyət göstərir. Böyük və kiçik firmaların müsbət və mənfi cəhətlərini daha ətraflı təhlil edəcəyik.
Xaricdə rent a car şirkətlərinin ofisləri adətən hava limanlarının yaxınlığında və şəhərlərin mərkəzində yerləşir. Məsələn, Los-Anceles hava limanında, terminalların yanında xüsusi dayanacaq var ki, orada yalnız rent a car şirkətlərinin avtobusları dayanır, onlar insanları ofislərinə aparırlar. Rent a car şirkətlərində vaxtaşırı müxtəlif aksiyalar keçirilir və endirimlər edilir.
Xaricdə kirayə avtomobil axtararkən seçim məsələsində çətinlik çəkməyəcəksiniz. Çünki avtomobillərin geniş çeşidi var. Yaxşı olar ki, istədiyiniz avtomobili rent a car şirkətinin veb saytında əvvəlcədən sifariş edəsiniz. Bunu edəcəyiniz halda, heç bir pis sürprizlə qarşılaşmayacaqsınız və maşın sizə lazım olan icarə nöqtəsində təhvil veriləcək.
Kirayə verilən avtomobillərin çoxu əla vəziyyətdədir. Çünki böyük rent a car şirkətləri zəmanəti olmayan avtomobilləri saxlamağın tərəfdarı deyillər.
Ancaq böyük rent a car şirkətlərinin mənfi cəhətləri də var. Onlar güzəşt etmirlər, güzəştə getmirlər. Bütün xidmətlər müqaviləyə uyğun olaraq edilir - nə az, nə də çox.
Böyük rent a car şirkətlərində kirayə haqqı daha çoxdur. Ancaq bunu mənfi hal hesab etmək düzgün deyil. Çünki ucuz və köhnəlmiş avtomobilləri kirayə götürsəniz, problem yaşaya bilərsiniz. "Xəsis iki dəfə ödəyir" deyimini unutmayın. Buna görə də kirayə avtomobil götürərkən düzgün seçim etməlisiniz.
