Hansı daha məsləhətlidir: dizellə, yoxsa benzinlə işləyən avtomobil?
Avtomobil həvəskarlarını ən çox maraqlandıran suallardan biri də onun benzin, yoxsa dizellə idarə olunmasıdır. Benzinin qiymətinin dizelin qiyməti ilə müqayisədə çox olduğunu nəzərə alaraq, çoxu dizel maşınları üstün tutur. Halbuki bu, doğru yanaşma deyil. Ən düzgün yanaşma faydalı maşını seçməkdir.
Dizellə işləyən avtomobil gün ərzində maşını çox sürən, uzun yol qət edən adamlar üçün sərfəlidir. Yox, əgər, siz 100 kilometrdən az sürürsünüzsə, onda dizel sizə sərf etməyəcək. Çünki dizel yanacağının keyfiyyəti aşağıdır və bu, avtomobilin istismar müddətinin uzunömürlülüyünə təsir edir.
Dizelin qiymətinin ucuz olması bazarda dizellə işləyən avtomobillərə tələbatı artırır. Bu da həmin avtomobillərin qiymətinin bahalaşmasına səbəb olur. Reallıq isə budur ki, dizellə işləyən avtomobillərin üstünlüyü ancaq yanacağın sərfiyyatı ilə bağlıdır. Benzin 100 km-ə 10 litr işlədirsə, dizel 6 litr işlədir. Dizel yanacağının qiyməti benzinə nisbətdə ucuzdur. İki avtomobilin mühərrikində isə heç bir fərq yoxdur. İkisi də daxili yanma mühərrikidir.
Benzindın fərqli olaraq, dizel yanacaqlarının avtomobilə müəyyən təsirləri ola bilər. Dizeldə benzinə nisbətən yüksək molekullu karbohidrogenlər var. Ona görə də, yanma tam gedə bilməyə bilər. Bunu karbon qazının miqdarından bilmək mümkündür. Benzin yanacağı daha təmiz yanacaqdır. Karbohidrogenlər nə qədər aşağı molekulludursa, yanma o qədər yaxşı gedir.
Avtomobil istehsalçıları müxtəlif regionlar və iqlim şəraitinə uyğunlaşdırılmış modellər hazırlayırlar. Məsələn, MDB üçün olan maşınlar yolsuzluq şəraitinə uyğun götürülür. Bəzən isə ikinci əl bazarında Ərəbistan üçün olan avtomobilə belə rast gəlmək olur. Elə avtomobillər var ki, onun içində qızdırıcı sistem yoxdur. Bu isə o deməkdir ki, onu buraya gətirib donmaq olar. Aydındır ki, Yaponiya və İngiltərə üçün olan avtomobillər Azərbaycan üçün məsləhət deyil, çünki bu zaman onların sükan yerlərinin dəyişməsi böyük xərclər ortaya çıxarır.
