Sürətli avtomobillərin yanacaq sərfiyyatı
Bakıda ikiqapılı, kiçik ölçülü, sürətli avtomobillərlə rastlaşırıq. Hər kəsin diqqətini cəlb edən həmin avtomobillərdən ölkəmizdə barmaqla sayılacaq qədərdir. Buna görə də həmin sürətli avtomobillərin insanların marağını çəkməsi normal haldır.
Sürət insanı hər zaman cəlb edib. Bu gün artıq əksər avtomobillər üçün 250 km/saat maksimal sürət adi haldır. Lüks sedanlar və idman avtomobilləri üçün isə 300 km/saat qeyri-adi deyil.
O cür maşınlarla qarşılaşanda özümüzə ilk olaraq bu sualı veririk: "Görəsən, bu avtomobillər nə qədər yanacaq sərf edir?". Lamborghini, Ferrari, Ford Mustang kimi avtomobillərin yanacaq sərfiyyatı hər kəsə maraqlıdır.
Avtomobillərin yanacaq sərfiyyatı onun hərəkət sürətindən, yolların rahatlığından, tıxaclardan, sürücünün idarəetməsindən və s. amillərdən asılı olaraq dəyişə bilir.
Ferrari F458 F142 - Bu avtomobil günümüzün ən sürətli avtomobillərindən sayılır. Yanacaq sərfiyyatının 120 km/saat sürətlə 100 km üçün 20-30 litr olduğu bildirilir. Zavod məlumatlarında bu göstərici xeyli aşağıdır. 0-40 km/saat sürətlə isə 15 litrdən çox yanacaq sərf edir.
Sürətli avtomobillərdən bəhs ediriksə, Bugatti Chiron 8.0 W16 avtomobilini unutmaq olmaz. 1500 at gücünə malik olan bu avtomobilin yanacaq sərfiyyatı 100 km üçün 19-33 litr təşkil edir.
Lamborghini Aventador 6.5 - Bu avtomobil də sürətli maşınlar siyahısına daxildir. Bakıda da rastlaşdığımız Lamborghini Aventador 6.5 avtomobili 770 at gücünə malikdir. Məlumatlara görə, avtomobil 100 km üçün 17-27 litr yanacaq sərf edir.
Sürətli maşınlar sırasında Lamborghini Huracan da var. Lamborghini Huracan 580 at gücünə malikdir. 100 km üçün avtomobilin yanacaq sərfiyyatı 18 litrdən yüksəkdir.
Ford Mustang Convertible 5.0 Ti-VCT V8 GT - Bu avtomobil 421 at gücünə malikdir. Yanacaq sərfiyyatı isə 100 km üçün 22 litrə qədər yüksələ bilir. Daha yüksək də ola bilər.
