İşlənmiş avtomobil alanda nəyə fikir vermək lazımdır?

Avtomobil alanda bütün incəliklərə fikir verməli olduğunuzu yəqin ki, bilirsiniz. İşlənmiş maşın alanda ikiqat diqqətli olmaq məcburiyyətindəsiniz.
Avtomobil haradan alınıb, bu vaxta qədər hansı qəzalardan çıxıb, hansı təmirlərdən keçib - bunları bilmək çox vacibdir. Avtomobilin "keçmiş həyatını" araşdırmalısınız. Əks təqdirdə, sizi aldada bilərlər.
Avtomobil Azərbaycandakı dilerdən alınıbsa, dilerdən onun tarixçəsini götürə bilərsiniz. Orada fikir verməlisiniz ki, avtomobil nə vaxt alınıb, sistematik olaraq ona qulluq olunubmu, hansı qəzalar və hansı təmirlər görüb? Əslində, bunlar avtomobil haqqında tam məlumat vermir, amma heç olmasa siz avtomobilin getdiyi kilometr haqqında düzgün məlumatlar ala biləcəksiniz. Çünki ikinci əl bazarında satılan avtomobillərin əksəriyyətində kilometr göstəricisində aldadırlar.
Kilometr göstəricisi, yəni bu vaxtadək avtomobilin nə qədər sürülməsi onun qiymətinə təsir edən ən vacib məqamlardandır. Məhz onu bilməklə özünüzdə bundan sonra avtomobili nə qədər idarə etməyin mümkün olduğunu müəyyənləşdirəcəksiniz.

Avtomobillərdə elə nasazlıqlar ola bilər ki, onları qısa müddətdə təyin etmək qeyri-mümkündür. Məsələn, soyuq vaxtlarda səhər avtomobil yaxşı işə düşmür və ya sürətlə hərəkət edən zaman titrəyişlər olur. Bundan başqa, avtomobilin yağ yeməsi haqqında məlumatı ala bilməyəcəksiniz. Bunu sizə diaqnostika da deməyəcək. Bunun üçün məsləhət görülür ki, işlənmiş avtomobili tanıdığınız adamdan, etibar etdiyiniz yerdən alın. Avtomobilin yağı yeyib-yemədiyini özünüzdə müəyyənləşdirməlisiniz. Bundan əlavə, yüksək sürətlə hərəkət edəndə avtomobilin özünü necə apardığını da bilmək lazımdır.
Maşın alanda mütləq test yürüşü etmək lazımdır. Müxtəlif rejimlərdə maşını idarə etdikdə bütün nasazlıqları üzə çıxacaq. Buna görə də hər kəs avtomobil seçərkən mütləq test-drayv etməlidir. Bunu etmədən işlənmiş maşın almaq ağılsızlıq olar. Çoxlu pul xərcləyib keyfiyyətsiz avtomobil almağı heç kim istəməz. Amma əfsuslar olsun ki, yetərli qədər məlumatlı olmayanda sizi aldada bilərlər. Məhz bu cür hallarla üzləşməmək üçün isə mütləq test yürüşü etmək lazımdır. Özü də almaq istədiyiniz avtomobili sürərkən ehtiyatlı davranmaq olmaz. Əksinə, onu müxtəlif rejimlərdə idarə etmək lazımdır. Əgər avtomobil bu sınaqlardan üzüağ çıxarsa, deməli, onu almağa dəyər.