Ən az yanacaq işlədən maşınlar
Avtomobil alarkən əksər insanlar çalışırlar ki, ən az yanacaq işlədən maşını seçsinlər. Söhbət ən kiçik mühərriklə az yanacaq işlədən avtomobillərdən gedir. Ən kiçik mühərrikli və az yanacaq sərf edən modellər əsasən Çin, Amerika və Yaponiya istehsalı olan avtomobillərdir.
Xüsusilə, taksi fəaliyyət ilə məşğul olmağı planlaşdıranlar az yanacaq işlədən avtomobil axtarışına çıxırlar. Belə avtomobillərin siyahısında ilk pillədə "Changan" şirkətinin "Benni" avtomobili qərarlaşır. Cəmi 1 litr həcmli 80 at gücündə mühərriklə "Changan Benni" 100 km məsafəyə 5,2- 5,7 litr yanacaq sərf edir.
Ən çox satılan kiçik mühərrikli avtomobillərdən biri də "Chevrolet Aveo"dur. Avtomobilin ən az yanacaq sərf edən modeli isə 1.2 mexaniki sürət qutulu versiyasıdır. 86 at gücündə mühərriklə təhciz edilən avtomobil şəhər içində 6 litr, şossedə isə 4 litr yanacaq işlədir. "Chevrolet Aveo" alanlar əsasən 25-35 yaşlı xanımlar və 25-45 yaşlı kişilərdir. Alıcıların 70 %-i kişi , 30 %-i isə xanımlardır.
Bu siyahıya "Nissan Mikra"nı da əlavə etmək olar. Bu avtomobil "Nissan" modelləri arasında ən az yanacaq sərf edəndir. Avtomobil 1.2 l benzin mühərikklə təhciz edilib. Mühərrik 80 at gücündədir. Şəhər içində 6-7 litr, şosedə 4,5-5 litr yanacaq işlədir. Bununla yanaşı, avtomobilin dizaynının cəlbedici olması və salonun genişliyi marağı artırır.
Ən kiçik mühərrikli və az yanacaq işlədən avtomobillər sırasında Azərbaycanda istehsal olan avtomobil də var. Söhbət Naxçıvan Avtomobil Zavodunun (NAZ) istehsalı olan "Naz-lifan 330" avtomobilindən gedir. 88 at gücündə 1,3 litr həcmli mühərrik avtomobilə maksimum 160 km/saat sürət verə bilir. Avtomat sürət qutulu avtomobilin orta yanacaq sərfiyyatı isə 6 litr təşkil edir.
Ən kiçik mühərrikli avtomobillərdən biri də İran istehsalı olan "Saipa 131" modelidir. Mexaniki sürət qutulu "Saipa 131" 1.3 l mühərriklə təhciz edilib. Avtomobil şəhəriçi yollarda 100 km-ə 6-7 litr, şossedə isə 100 kilometr məsafə üçün cəmi 4 litr yanacaq sərf edir. Ona görə də, bu avtomobili 90 % hallarda taksi fəaliyyəti göstərmək istəyən sürücülər alır.
