Avtomobil alarkən diqqət edilməli məqamlar
Avtomobil alarkən olduqca diqqətli olmaq lazımdır. İsrafa yol verməmək, uduzmamaq istəyirsinizsə, tələsməməli, avtomobil alarkən bir çox məqamlara fikir verməlisiniz.
Məlum məsələdir ki, hər kəs qənaətcil, sərfəli avtomobil almağı arzulayır. Bu anlayışlar hər ölkədə fərqli yozulur. Dünyanın müxtəlif yerlərində fərqli avtomobil istehsalçıları, standartlar, istifadə şərtləri sərfəlilik fikrini rəngarəng edir. Amma ümumiləşdirsək, alıcını narahat edən əsas məsələ ehtiyat hissələrinin ucuz olması və asanlıqla tapılmasıdır.
Təbii ki, avtomobillər yeniləndikcə onların hissələrinin də qiymətləri dəyişir. Məsələn, 2012-ci ildə istehsal olunan avtomobilin hissələrinin qiyməti ilə 2020-ci ildə istehsal edilən avtomobilin hissələrinin qiyməti eyni ola bilməz. İstehsal ili daha yeni olan avtomobilin hissələri digərinə nisbətən baha olacaq və bu, normal haldır, çünki o, yenidir.
Avtomobil almaq istəyənləri düşündürən daha bir sual var: görəsən, bu avtomobil nə qədər yanacaq sərf edir? Hamı istəyər ki, 100 kilometrə mümkün qədər az yanacaq sərf edən avtomobil alsın. Ancaq maşının sərf etdiyi benzinin həcmi həmin avtomobildən əlavə, sürücünün özündən də asılıdır. Kimsə gündə 35 km yol sürürsə, yanacaq sərfiyyatı yüksək olmayacaq. Belə şəxs üçün əsas məsələ yanacaq deyil, avtomobilin sağlam olmasıdır. Yəni sürücü avtomobilindən düzgün istifadə etməlidir.
Əgər işinizdə əlaqədar gün ərzində çox yol qət etməlisinizsə, onda dizel və ya qazla çalışan avtomobil, yaxud hibrid maşın ala bilərsiniz. Amma avtomobildən az istifadə edirsinizsə, ancaq işə getmək və işdən gəlmək üçün sizə maşın lazımdırsa, onda benzin sizin üçün ən sərfəlidir.
Avtomobilin dözümlü olması da alıcılar üçün vacib məqamlardan biridir. Amma unutmaq olmaz ki, düzgün qulluq edilsə, müasir avtomobillərin əksəriyyəti milyon metrə qədər məsafə qət edə bilir. Hər il avtomobillərin müasirləşdiyinin şahidi oluruq. Bu isə o deməkdir ki, maşına düzgün qulluq olunsa, texniki nasazlıqlar vaxtında aradan qaldırılsa, o, uzun müddət sizə xidmət edər və avtomobil sürmək sizin üçün sərfəli olar.
Əksəriyyət sərfəli anlayışını avtomobili ucuz almaq və ətrafdakıların çox istifadə etdiyi modelə üstünlük verməkdə görür. Əslində isə belə deyil. Başqalarının sürdüyü avtomobilə əsasən seçim etməməlisiniz. Sərfəli avtomobil hər kəsin sürdüyü model demək deyil. Sərfəli həm də şəxsi büdcəyə uyğun, vaxtında texniki qulluq görən avtomobildir. Bunları nəzərə almaqla daha düzgün seçim edə bilərsiniz.
